老婆條屍唔見咗（上）
我個車尾廂，裝住我老婆條屍。
我知道大家一定會鬧我瘋狂變態，但我都唔想㗎，一切都係意外。
我脾氣唔好，偏偏老婆又好囉唆，同一件事講幾十次。
今日同佢嘈交，佢又拎番N年前嘅嘢嚟講，我捏住佢條頸叫佢唔好咁囉唆，然後……佢就斷咗氣。
我好驚，我唔係有心㗎。
我唔想坐監，我好慌張咁將老婆塞落車尾廂，想搵個山，埋咗條屍佢。
我一路揸車，一路諗，條屍要埋去邊？大家一定會問我，老婆去咗邊，我要點答？
我諗唔到答案，我從來冇諗過會殺人，我個腦一片慌亂。
好不容易揸車上到山，我打開車尾廂，想拎個鏟出嚟挖洞。
但係，老婆條屍唔見咗！
車尾廂內空盪盪，只有個鏟提醒我，啱啱嘅事並唔係幻覺，我係為咗埋屍，先將個鏟擺落車尾廂㗎。
咁條屍去咗邊？我毛骨悚然，但我強逼自己冷靜。
諗一諗，唔通啱啱嘅山路太顛簸，震開咗車尾廂，老婆跌咗出嚟？
雖然可能性好低，但福爾摩斯都講過，排除一切不可能嘅因素之後，剩低嗰個答案，無論幾唔合情理，都係真相。
屍體跌喺路邊，好容易就會被路人發現，我即刻揸車返轉頭，想搵番條屍。
但我將山路來來回回行咗兩次，自己落埋車，用腳行一次，都見唔到條屍。
我估，屍體應該跌咗落某個山旮旯位，我搵唔到，就代表佢好容易被發現，我即將要坐監。
但天色已晚，我成晚唔返屋企都好可疑，我唯有揸車返屋企。
返到屋企，關埋門，我壓抑已久嘅情緒終於崩潰，我連燈都冇開，就蹲喺地下喊：「我點算啊？老婆……點算啊？」
「啪」一聲，燈開咗，老婆企喺我隔離，憂心忡忡咁問：「發生咩事？你喊乜嘢？」
我嚇到語無倫次：「我……老婆你唔係……」
「我唔係乜嘢？」老婆問。
我一時語塞，唔通我話「你唔係俾我殺咗咩」。
我趕快擦乾眼淚：「哦，啱啱同朋友出去睇波，我支持嗰隊輸咗。」
「睇到咁夜？我打咗幾次電話畀你都冇人聽，咪熄燈瞓咗陣。」老婆話。
啱啱電話係有響過，但嗰種情況，我邊有心情理個電話。
老婆仲在生，我唔駛埋屍，唔會坐監，一切都好美好。
我衝上去攬住老婆：「對唔住啊，我以後唔會咁。」
夜晚瞓覺，其實都有啲驚。
我有諗過，會唔會係老婆做鬼返嚟搵我，但佢又有呼吸又有腳，完全唔似鬼，而且佢嘅態度，都唔似返嚟報仇丫。
我提心吊膽咁過咗一晚，清晨嘅陽光透窗灑落老婆身上，佢依然瞓到打晒鼻鼾。
我終於鬆一口氣，老婆冇死到。
我照常起身揸車返工，忍唔住打開個車尾廂望吓，個鏟仲喺度。
尋日嘅每一幕都無比清晰，由捏死老婆、確定佢失去呼吸，抱佢入車尾廂，到條屍唔見咗，搵極都搵唔到……
我確定，我尋日真係殺咗佢，只係唔知點解，老婆冇死到，仲唔記得咗我殺佢嘅事。
呢件事非常詭異，但點睇都係好事，而且又唔可以同人講，所以我都冇再諗咁多。
更令我驚喜嘅係，自從老婆「死」過一次後，佢就唔再好似以前咁囉唆。
佢依然會好細心咁叮囑我，只係佢唔會反反覆覆咁講同一樣嘢，亦唔會拎番N年前嘅嘢嚟講。
我哋嘅相處舒服咗，你係咪以為，我哋會從此幸福快樂咁生活落去？
下集：https://bit.ly/2YYu84K
願天下有情人終成兄妹：https://goo.gl/AVtejy
霸道總裁愛上你：http://bit.do/e4FWX
#短故 #短篇 #小說 #陳美濤 #廣東話 #粵語 #tomatochan #老婆條屍唔見咗
Search